ताईंनी लोकसभेच्या सहाव्या निवडणूकीत अमरावती मतदारसंघामधून निवडणूक लढविली. त्या निवडून आल्या. लोकसभेत त्यांनी आपल्या उत्तम सहभागाची चुणूक दाखविेली. राष्ट्राच्या दृष्टीने अत्यंत हिताच्या प्रश्‍नांवर त्यांनी आपला आवाज उठविला विविध विषयांवरच्या चर्चेत सहभाग घेऊन आपल्या सक्रियतेचा प्रत्यय दिला. केवळ एका विषयांवर लक्ष केंद्रित केले नाही तर त्यांनी सहभाग घेतलेल्या विषयांमध्ये कुटुंब नियोजन, बँकिंग, सहकारी संस्था ते बाबरी मशिदीचे पतन आदि विषयांवर त्यांनी आपली परखड मते मांडली. त्यांची संसदीय समितीच्या अध्यक्षपदी नियुक्तीही झाली. १९९५ साली त्यांनी बिजिंग येथे स्त्रीयांच्या समस्येंवर होणार्‍या जागतिक परिषदेंसाठी त्यांनी भारताच्या प्रतिनिधी म्हणून सहभाग घेतला.

ताई या राजस्थानच्या पहिल्या महिला राज्यपाल म्हणून नोव्हेंबर २००४ मध्ये नियुक्त झाल्या. या ठिकाणी त्यांच्या जबाबदारीचे स्वरूप वेगळे होते. राज्यस्थान राज्याच्या त्या घटनात्मक प्रमुख होत्या, राज्यातील विद्यापीठांच्या त्या कुलपती होत्या आणि पश्‍चिम विभागाच्या सांस्कृतिक केंद्राच्या त्या प्रमुख होत्या. त्यांनी या विविध जबाबदार्‍या समर्थपणे पार पाडल्या. विशेषकरून या काळात त्यांनी आरोग्यसेवेत लक्षणीय सुधारणा, जवानांच्या विधवा आणि उच्च शिक्षण या क्षेत्रात उल्लेखनीय काम केले.